چاند کا نور تو سورج سے جڑا رہتا ہے

چاند کا نور تو سورج سے جڑا رہتا ہے

سوز نغمہ دل مضطر سے جڑا رہتا ہے

لاکھ ماضی کے دریچوں کو مقفل کر لو

ایک منظر پس منظر سے جڑا رہتا ہے

اپنی تہذیب کے ورثے کو بچا کر رکھنا

پھول کھلتا ہے جو مٹی سے جڑا رہتا ہے

خس و خاشاک کے مانند بکھر جائے گا

ذہن و دل وہ جو تکبر سے بھرا رہتا ہے

ہم تواضع تو بہت کرتے ہیں مہمانوں کی

غرض ہوتی ہے وہ اخلاص کجا رہتا ہے

بے عمل لوگ بھی بن جاتے ہیں واعظ اکثر

قول اور فعل میں صدیوں کا خلا رہتا ہے

ہم نے در در کی بہت خاک ہے چھانی ناہیدؔ

راز اب جا کے کھلا دل میں خدا رہتا ہے