chand ka nur to suraj se juDa rahta hai

chāñd kā nuur to sūraj se juḌā rahtā hai

soz-e-naġhma dil-e-muztar se juḌā rahtā hai

laakh maazī ke darīchoñ ko muqaffal kar lo

ek manzar pas-e-manzar se juḌā rahtā hai

apnī tahzīb ke virse ko bachā kar rakhnā

phuul khiltā hai jo miTTī se juḌā rahtā hai

ḳhas-o-ḳhāshāk ke mānind bikhar jā.egā

zehn-o-dil vo jo takabbur se bharā rahtā hai

ham tavāzo' to bahut karte haiñ mehmānoñ kī

ġharz hotī hai vo iḳhlās kujā rahtā hai

be-‘amal log bhī ban jaate haiñ vā'iz aksar

qaul aur fe'l meñ sadiyoñ kā ḳhalā rahtā hai

ham ne dar-dar kī bahut ḳhaak hai chhānī 'nāhīd'

raaz ab jā ke khulā dil meñ ḳhudā rahtā hai

chand ka nur to suraj se juDa rahta hai

soz-e-naghma dil-e-muztar se juDa rahta hai

lakh mazi ke darichon ko muqaffal kar lo

ek manzar pas-e-manzar se juDa rahta hai

apni tahzib ke wirse ko bacha kar rakhna

phul khilta hai jo miTTi se juDa rahta hai

KHas-o-KHashak ke manind bikhar jaega

zehn-o-dil wo jo takabbur se bhara rahta hai

hum tawazo' to bahut karte hain mehmanon ki

gharz hoti hai wo iKHlas kuja rahta hai

be-‘amal log bhi ban jate hain wa'iz aksar

qaul aur fe'l mein sadiyon ka KHala rahta hai

hum ne dar-dar ki bahut KHak hai chhani 'nahid'

raaz ab ja ke khula dil mein KHuda rahta hai