chand ki kirnon ki chadar ne sab ke rup chhupae hain

chāñd kī kirnoñ kī chādar ne sab ke ruup chhupā.e haiñ

āñkhoñ vaale sab hī jā kar nagrī se lauT aa.e haiñ

tārīkī kā naam ho raushan aage pīchhe ek diyā

raushniyoñ ke vīrāne meñ aage pīchhe saa.e haiñ

kirnoñ ke dhāgoñ ko sameTe uun kā golā Duub gayā

nañgī dhartī lambī rāteñ dekh ke ham tharrā.e haiñ

jhāḌī jhāḌī sūñgh rahā huuñ koī bhī ḳhargosh nahīñ

kuttoñ jaise pair kahāñ se har jhāḌī tak aa.e haiñ

lohe aur patthar kī saarī tasvīreñ miT jā.eñgī

kāġhaz ke parde par ham ne sab ke ruup jamā.e haiñ

ghanTī kī āvāzeñ sach haiñ chīḳh pe koī kaan na do

lohe ke tābūt meñ 'mājid' insānoñ ke saa.e haiñ

chand ki kirnon ki chadar ne sab ke rup chhupae hain

aankhon wale sab hi ja kar nagri se lauT aae hain

tariki ka nam ho raushan aage pichhe ek diya

raushniyon ke virane mein aage pichhe sae hain

kirnon ke dhagon ko sameTe un ka gola Dub gaya

nangi dharti lambi raaten dekh ke hum tharrae hain

jhaDi jhaDi sungh raha hun koi bhi KHargosh nahin

kutton jaise pair kahan se har jhaDi tak aae hain

lohe aur patthar ki sari taswiren miT jaengi

kaghaz ke parde par hum ne sab ke rup jamae hain

ghanTi ki aawazen sach hain chiKH pe koi kan na do

lohe ke tabut mein 'majid' insanon ke sae hain