چاند کو بر زمیں اتارا ہے

چاند کو بر زمیں اتارا ہے

آج کس نے تجھے سنوارا ہے

جسم و جاں میں حیات بہتی ہے

دل مگر تیسرا کنارا ہے

زندگی کے ہر اک جھمیلے میں

میں نے تجھ کو ہی تو پکارا ہے

کار گاہ خیال جاناں میں

میں نے ہر نقش کو نکھارا ہے

میں تو بچپن سے یہ سمجھتا ہوں

چاند روٹی کا استعارہ ہے

تشنگی اور غرور دریا میں

کون جیتا ہے کون ہارا ہے

رحم و لطف و کرم سے ہٹ کر کیا

بندگی کا کوئی سہارا ہے

تیرے ماتھے کی روشنی میں عیاں

رات کا آخری ستارا ہے