chand ko bar-zamin utara hai

chāñd ko bar-zamīñ utārā hai

aaj kis ne tujhe sañvārā hai

jism-o-jāñ meñ hayāt bahtī hai

dil magar tīsrā kinārā hai

zindagī ke har ik jhamele meñ

maiñ ne tujh ko hī to pukārā hai

kār-gāh-e-ḳhayāl-e-jānāñ meñ

maiñ ne har naqsh ko nikhārā hai

maiñ to bachpan se ye samajhtā huuñ

chāñd roTī kā isti'āra hai

tishnagī aur ġhurūr dariyā meñ

kaun jiitā hai kaun haarā hai

rahm-o-lutf-o-karam se haT kar kyā

bandagī kā koī sahārā hai

tere māthe kī raushnī meñ 'ayāñ

raat kā āḳhirī sitārā hai

chand ko bar-zamin utara hai

aaj kis ne tujhe sanwara hai

jism-o-jaan mein hayat bahti hai

dil magar tisra kinara hai

zindagi ke har ek jhamele mein

main ne tujh ko hi to pukara hai

kar-gah-e-KHayal-e-jaanan mein

main ne har naqsh ko nikhaara hai

main to bachpan se ye samajhta hun

chand roTi ka isti'ara hai

tishnagi aur ghurur dariya mein

kaun jita hai kaun haara hai

rahm-o-lutf-o-karam se haT kar kya

bandagi ka koi sahaara hai

tere mathe ki raushni mein 'ayan

raat ka aaKHiri sitara hai