chand ko le kar chali gai hai dur kahin baraat bahut

chāñd ko le kar chalī ga.ī hai duur kahīñ bārāt bahut

ham bhī chalo ab so jaa.eñ ki biit ga.ī hai raat bahut

sāvan meñ ġhazab kā sūkhā thā huī chait meñ hai barsāt bahut

rishtoñ kī jagah un rishtoñ kī ab hone lagī hai baat bahut

jā pahuñche log to manzil par maiñ ḳhush huuñ ab tak safar meñ huuñ

ki mere liye ai jān-e-ġhazal hai haath meñ terā haath bahut

kuchh log hamārī bastī meñ aa ga.e haiñ sakte meñ sun kar

ki vo jo kal tak gūñge the ab karne lage haiñ baat bahut

soch-samajh kar baat kiyā kar ai sultān faqīroñ se

ho saktā hai kisī faqīr kī nikal aa.e auqāt bahut

daulat vāloñ kī hai shohrat shohrat vāloñ kī daulat

izzat se haiñ ham bastī meñ ye hī baḌī hai baat bahut

do roz judā.ī ke tujh se itnī to baḌī koī baat nahīñ

barsoñ se bhī lambe dekhe haiñ ham ne to 'salīl' din-rāt bahut

chand ko le kar chali gai hai dur kahin baraat bahut

hum bhi chalo ab so jaen ki bit gai hai raat bahut

sawan mein ghazab ka sukha tha hui chait mein hai barsat bahut

rishton ki jagah un rishton ki ab hone lagi hai baat bahut

ja pahunche log to manzil par main KHush hun ab tak safar mein hun

ki mere liye ai jaan-e-ghazal hai hath mein tera hath bahut

kuchh log hamari basti mein aa gae hain sakte mein sun kar

ki wo jo kal tak gunge the ab karne lage hain baat bahut

soch-samajh kar baat kiya kar ai sultan faqiron se

ho sakta hai kisi faqir ki nikal aae auqat bahut

daulat walon ki hai shohrat shohrat walon ki daulat

izzat se hain hum basti mein ye hi baDi hai baat bahut

do roz judai ke tujh se itni to baDi koi baat nahin

barson se bhi lambe dekhe hain hum ne to 'salil' din-raat bahut