chand mashriq se nikalta nahin dekha maine

chāñd mashriq se nikaltā nahīñ dekhā maiñ ne

tujh ko dekhā hai to tujh sā nahīñ dekhā maiñ ne

hādisa jo bhī ho chup-chāp guzar jaatā hai

dil se achchhā koī rasta nahīñ dekhā maiñ ne

phir darīche se vo ḳhushbū nahīñ pahuñchī mujh tak

phir vo mausam kabhī dil kā nahīñ dekhā maiñ ne

mom kā chāñd hathelī pe liye phirtā huuñ

shahr meñ dhuup kā mela nahīñ dekhā maiñ ne

chaḌhte sūraj kī shuāoñ ne mujhe paalā hai

jo utar jaa.e vo dariyā nahīñ dekhā maiñ ne

phir mire paañv kī zanjīr hilā de koī

kab se is shahr kā rasta nahīñ dekhā maiñ ne

mujh ko paanī meñ utarne kī sazā detā hai

vo samajhtā hai ki dariyā nahīñ dekhā maiñ ne

'qais' kahte haiñ faqīroñ pe bahut bhauñktā hai

apne ham-sā.e kā kuttā nahīñ dekhā maiñ ne

chand mashriq se nikalta nahin dekha main ne

tujh ko dekha hai to tujh sa nahin dekha main ne

hadisa jo bhi ho chup-chap guzar jata hai

dil se achchha koi rasta nahin dekha main ne

phir dariche se wo KHushbu nahin pahunchi mujh tak

phir wo mausam kabhi dil ka nahin dekha main ne

mom ka chand hatheli pe liye phirta hun

shahr mein dhup ka mela nahin dekha main ne

chaDhte suraj ki shuaon ne mujhe pala hai

jo utar jae wo dariya nahin dekha main ne

phir mere panw ki zanjir hila de koi

kab se is shahr ka rasta nahin dekha main ne

mujh ko pani mein utarne ki saza deta hai

wo samajhta hai ki dariya nahin dekha main ne

'qais' kahte hain faqiron pe bahut bhaunkta hai

apne ham-sae ka kutta nahin dekha main ne