chand mere ghar mein utra tha kahin Duba na tha

chāñd mere ghar meñ utrā thā kahīñ Duubā na thā

ai mire sūraj abhī aanā tirā achchhā na thā

maiñ ne sun lī thī tire qadmoñ kī aahaT duur se

tū na aa.egā kabhī dil meñ mire dhaḌkā na thā

maiñ ne dekhā thā sar-e-ā.īna ik paikar kā aks

hū-ba-hū ham-shakal thā merā magar mujh sā na thā

kyuuñ jhulas Daalā hai us ne mere ḳhadd-o-ḳhāl ko

vaqt ik dariyā thā lekin aag kā dariyā na thā

band paanī ke bhañvar meñ kho ga.ī kashtī mirī

aañkh jal-thal thī magar aañsū koī Tapkā na thā

maiñ na dāmān-e-charāġh-e-be-navā ban kar jalā

thī talab jhoñke kī mujh ko aur tū jhoñkā na thā

ghuum kar dekhā to thā jis raah par tanhā ravāñ

bhiiḌ itnī thī ki chalne ko vahāñ rastā na thā

maiñ ki vus.at kī tamannā meñ bagūlā ban gayā

ret ke zarre the dāman meñ mire sahrā na thā

kāhish-e-soz-o-ziyāñ ne raakh kar Daalā mujhe

maiñ ne samjhā thā ki ye sho.ala yahāñ jaltā na thā

mere sahrā kī tapish ko dekh kar hairāñ na thā

abr ghir kar bārhā aayā magar barsā na thā

apne bachchoñ kā tabassum dekh kar 'ārif' batā

ghar kī vīrānī kā tujh ko shikva-e-bejā na thā

chand mere ghar mein utra tha kahin Duba na tha

ai mere suraj abhi aana tera achchha na tha

main ne sun li thi tere qadmon ki aahaT dur se

tu na aaega kabhi dil mein mere dhaDka na tha

main ne dekha tha sar-e-aina ek paikar ka aks

hu-ba-hu ham-shakal tha mera magar mujh sa na tha

kyun jhulas Dala hai us ne mere KHadd-o-KHal ko

waqt ek dariya tha lekin aag ka dariya na tha

band pani ke bhanwar mein kho gai kashti meri

aankh jal-thal thi magar aansu koi Tapka na tha

main na daman-e-charagh-e-be-nawa ban kar jala

thi talab jhonke ki mujh ko aur tu jhonka na tha

ghum kar dekha to tha jis rah par tanha rawan

bhiD itni thi ki chalne ko wahan rasta na tha

main ki wusat ki tamanna mein bagula ban gaya

ret ke zarre the daman mein mere sahra na tha

kahish-e-soz-o-ziyan ne rakh kar Dala mujhe

main ne samjha tha ki ye shoala yahan jalta na tha

mere sahra ki tapish ko dekh kar hairan na tha

abr ghir kar barha aaya magar barsa na tha

apne bachchon ka tabassum dekh kar 'arif' bata

ghar ki virani ka tujh ko shikwa-e-beja na tha