chand ne apna dip jalaya sham bujhi virane mein

chāñd ne apnā diip jalāyā shaam bujhī vīrāne meñ

us kī bastī duur hai shāyad der hai us ke aane meñ

kyā patthar kī bhārī sil hai ek ik lamha maazī kā

dekho dab kar rah jāoge itnā bojh uThāne meñ

us ko nahīñ dekhā hai jis ne mujh ko bhalā kyā samjhegā

in āñkhoñ se guzarnā hogā mere dil tak aane meñ

apnī zaat se kuchh nisbat thī vo bhī is kī ḳhātir se

merā zikr nahīñ miltā hai ab mere afsāne meñ

ek hī dukh thā merā apnā vo bhī is ko sauñp diyā

āḳhir dil kī baat zabāñ tak aa hī ga.ī anjāne meñ

ab to tum bhī jaan ga.ī ho tum ko kyā sukh miltā thā

mere ghar ke kaam meñ merī maañ kā haath baTāne meñ

merī rātoñ meñ mahke haiñ jo sapnoñ kī Daalī se

rañg hai in phūloñ kā shāmil aaj tire sharmāne meñ

jis se baat bhī karnī mushkil vo bhī is mahfil meñ hai

'mus.haf' kaisā lutf rahegā us ko sher sunāne meñ

chand ne apna dip jalaya sham bujhi virane mein

us ki basti dur hai shayad der hai us ke aane mein

kya patthar ki bhaari sil hai ek ek lamha mazi ka

dekho dab kar rah jaoge itna bojh uThane mein

us ko nahin dekha hai jis ne mujh ko bhala kya samjhega

in aankhon se guzarna hoga mere dil tak aane mein

apni zat se kuchh nisbat thi wo bhi is ki KHatir se

mera zikr nahin milta hai ab mere afsane mein

ek hi dukh tha mera apna wo bhi is ko saunp diya

aaKHir dil ki baat zaban tak aa hi gai anjaane mein

ab to tum bhi jaan gai ho tum ko kya sukh milta tha

mere ghar ke kaam mein meri man ka hath baTane mein

meri raaton mein mahke hain jo sapnon ki Dali se

rang hai in phulon ka shamil aaj tere sharmane mein

jis se baat bhi karni mushkil wo bhi is mahfil mein hai

'mushaf' kaisa lutf rahega us ko sher sunane mein