chand nikla hai sar-e-qarya-e-zulmat dekho

chāñd niklā hai sar-e-qarya-e-zulmat dekho

ho ga.ī kaisī siyah-ḳhānoñ kī rañgat dekho

sāmne jo hai use aañkh kā dhokā samjho

in dayāroñ ko sadā ḳhvāb kī sūrat dekho

sair hai jaise koii, aise jahāñ se guzro

duur tak phailā hai ik arsa-e-furqat dekho

zar kī parchhā.īñ jo paḌtī hai chamak uThtā hai

ādam-e-ḳhāk kī be-hoshī meñ hālat dekho

ḳhauf detā hai yahāñ abr meñ tanhā honā

shahr-e-dar-band meñ dīvāroñ kī kasrat dekho

saaya hai un pe bahut bhūlī huī yādoñ kā

shaam aa.ī hai parī-zādoñ meñ vahshat dekho

daaġh hai is ke na hone se diloñ meñ ab tak

uḌ gayā misl-e-sabā gul kī haqīqat dekho

jañgaloñ meñ koī pīchhe se bulā.e to 'munīr'

muḌ ke raste meñ kabhī us kī taraf mat dekho

chand nikla hai sar-e-qarya-e-zulmat dekho

ho gai kaisi siyah-KHanon ki rangat dekho

samne jo hai use aankh ka dhoka samjho

in dayaron ko sada KHwab ki surat dekho

sair hai jaise koi, aise jahan se guzro

dur tak phaila hai ek arsa-e-furqat dekho

zar ki parchhain jo paDti hai chamak uThta hai

aadam-e-KHak ki be-hoshi mein haalat dekho

KHauf deta hai yahan abr mein tanha hona

shahr-e-dar-band mein diwaron ki kasrat dekho

saya hai un pe bahut bhuli hui yaadon ka

sham aai hai pari-zadon mein wahshat dekho

dagh hai is ke na hone se dilon mein ab tak

uD gaya misl-e-saba gul ki haqiqat dekho

jangalon mein koi pichhe se bulae to 'munir'

muD ke raste mein kabhi us ki taraf mat dekho