chand nikla to samundar ki hawa tez hui

chāñd niklā to samundar kī havā tez huī

dard kuchh aur baḌhā raat junūñ-ḳhez huī

phir mire dil meñ udāsī kā diyā jalne lagā

phir tirī yaad ko tanhā.ī kī mahmez huī

jaise be-vaj.h kisī baat pe dil bhar aa.e

chashm-e-pur-ḳhūñ usī andāz se labrez huī

nā-rasā.ī kī thakan aur vo tanhā.ī kī raat

ik bayābāñ kī masāfat thī balā-ḳhez huī

shahr-e-gul-rang meñ zaḳhmoñ kā sulagtā mausam

āsmāñ surḳh fazā aur bhī gul-rez huī

lashkarī din ko bhī nikle the kamīñ-gāhoñ se

haañ magar jang bahut shaam ko ḳhūñ-rez huī

mil ga.e ḳhaak meñ jab chāñd sitāre se log

tab kahīñ jā ki ye miTTī mirī zarḳhez huī

chand nikla to samundar ki hawa tez hui

dard kuchh aur baDha raat junun-KHez hui

phir mere dil mein udasi ka diya jalne laga

phir teri yaad ko tanhai ki mahmez hui

jaise be-wajh kisi baat pe dil bhar aae

chashm-e-pur-KHun usi andaz se labrez hui

na-rasai ki thakan aur wo tanhai ki raat

ek bayaban ki masafat thi bala-KHez hui

shahr-e-gul-rang mein zaKHmon ka sulagta mausam

aasman surKH faza aur bhi gul-rez hui

lashkari din ko bhi nikle the kamin-gahon se

han magar jang bahut sham ko KHun-rez hui

mil gae KHak mein jab chand sitare se log

tab kahin ja ki ye miTTi meri zarKHez hui