chand sa chehra jo us ka aashkara ho gaya

chāñd sā chehra jo us kā āshkārā ho gayā

tan pe har qatra pasīne kā sharārā ho gayā

chhup sakā dam bhar na rāz-e-dil firāq-e-yār meñ

vo nihāñ jis dam huā sab āshkārā ho gayā

jis ko dekhā chashm-e-vehdat se vahī māshūq hai

paḌ ga.ī jis par nazar us kā nazārā ho gayā

ham-kinārī kī havas ai gauhar-e-yaktā ye hai

aab ho kar ġham se dil dariyā hamārā ho gayā

ḳhalq meñ gard-e-yatīmī se guhar kī qadr hai

ḳhāksārī se fuzūñ rutba hamārā ho gayā

dil meñ hai ai 'barq' us but ke dar-e-dandāñ kī yaad

ye guhar arsh-e-barīñ kā goshvāra ho gayā

chand sa chehra jo us ka aashkara ho gaya

tan pe har qatra pasine ka sharara ho gaya

chhup saka dam bhar na raaz-e-dil firaq-e-yar mein

wo nihan jis dam hua sab aashkara ho gaya

jis ko dekha chashm-e-wehdat se wahi mashuq hai

paD gai jis par nazar us ka nazara ho gaya

ham-kinari ki hawas ai gauhar-e-yakta ye hai

aab ho kar gham se dil dariya hamara ho gaya

KHalq mein gard-e-yatimi se guhar ki qadr hai

KHaksari se fuzun rutba hamara ho gaya

dil mein hai ai 'barq' us but ke dar-e-dandan ki yaad

ye guhar arsh-e-barin ka goshwara ho gaya