chand-suraj na sahi ek diya hun main bhi

chāñd-sūraj na sahī ek diyā huuñ maiñ bhī

apne tārīk makānoñ meñ jalā huuñ maiñ bhī

apne aslāf kī azmat se juḌā huuñ maiñ bhī

apnī tahzīb kī muTThī meñ dabā huuñ maiñ bhī

tum bhī girtī huī dīvār ko kāñdhā de do

apne pairoñ pe isī tarah khaḌā huuñ maiñ bhī

merī ḳhāmoshī-e-lab kā hai sadā se rishta

ye na samjhe koī be-saut-o-sadā huuñ maiñ bhī

koī DhūñDe mire chehre pe thakan ke āsār

vaqt ke saath to ik umr chalā huuñ maiñ bhī

jaane kab kis ke sañvarne kā irāda jaage

is liye sūrat-e-ā.īna rahā huuñ maiñ bhī

jhuk ke milne kī azal hī se hai fitrat 'shā.iq'

garche sar-basta-e-dastār-e-anā huuñ maiñ bhī

chand-suraj na sahi ek diya hun main bhi

apne tarik makanon mein jala hun main bhi

apne aslaf ki azmat se juDa hun main bhi

apni tahzib ki muTThi mein daba hun main bhi

tum bhi girti hui diwar ko kandha de do

apne pairon pe isi tarah khaDa hun main bhi

meri KHamoshi-e-lab ka hai sada se rishta

ye na samjhe koi be-saut-o-sada hun main bhi

koi DhunDe mere chehre pe thakan ke aasar

waqt ke sath to ek umr chala hun main bhi

jaane kab kis ke sanwarne ka irada jage

is liye surat-e-aina raha hun main bhi

jhuk ke milne ki azal hi se hai fitrat 'shaiq'

garche sar-basta-e-dastar-e-ana hun main bhi