chand suraj se pare aur kahin chahte hain

chāñd sūraj se pare aur kahīñ chāhte haiñ

āsmāñ jis pe na ho aisī zamīñ chāhte haiñ

jis qadar duur hai kuchh aur ziyāda us se

ab samajh lo ki use kitnā qarīñ chāhte haiñ

ik tasavvur hai ki tujh se bhī mushābah hai bahut

ham use chāhte haiñ tujh ko nahīñ chāhte haiñ

ham zamīñ ke haiñ kisī ‘arsh-e-mu’allā ke nahīñ

ai ḳhudā faisla ham log yahīñ chāhte haiñ

vo hameñ aur junūñ aur junūñ chāhtā hai

ham use aur hasīñ aur hasīñ chāhte haiñ

'ishq hotā hai gumāñ us ko gumāñ honā thā

hai kamī apnī ki ham us ko yaqīñ chāhte haiñ

chand suraj se pare aur kahin chahte hain

aasman jis pe na ho aisi zamin chahte hain

jis qadar dur hai kuchh aur ziyaada us se

ab samajh lo ki use kitna qarin chahte hain

ek tasawwur hai ki tujh se bhi mushabah hai bahut

hum use chahte hain tujh ko nahin chahte hain

hum zamin ke hain kisi ‘arsh-e-mu’alla ke nahin

ai KHuda faisla hum log yahin chahte hain

wo hamein aur junun aur junun chahta hai

hum use aur hasin aur hasin chahte hain

'ishq hota hai guman us ko guman hona tha

hai kami apni ki hum us ko yaqin chahte hain