chand tare jise har shab dekhen

chāñd taare jise har shab dekheñ

ham bhī us shoḳh ko yārab dekheñ

yuuñ mileñ un se ki apnā chehra

vo bhī hairān huuñ kal jab dekheñ

pahle bas dil ko ḳhabar thī dil kī

ab vafā aam huī sab dekheñ

qurb meñ kyā hai jo duurī meñ nahīñ

tum jo aao to kisī shab dekheñ

jī meñ hai phir kareñ iz.hār-e-vafā

phir tire larze hue lab dekheñ

maiñ ki huuñ ek hī āshufta ḳhayāl

log har baat meñ matlab dekheñ

jo kisī ne kabhī dekhe na sune

vo tamāshe vo fusūñ ab dekheñ

aaj to yuuñ gale lag jaao ki bas

phir to jaane tumheñ kab kab dekheñ

laakh patthar sahī vo but 'anjum'

vo ghaḌī ham se mile tab dekheñ

chand tare jise har shab dekhen

hum bhi us shoKH ko yarab dekhen

yun milen un se ki apna chehra

wo bhi hairan hun kal jab dekhen

pahle bas dil ko KHabar thi dil ki

ab wafa aam hui sab dekhen

qurb mein kya hai jo duri mein nahin

tum jo aao to kisi shab dekhen

ji mein hai phir karen izhaar-e-wafa

phir tere larze hue lab dekhen

main ki hun ek hi aashufta KHayal

log har baat mein matlab dekhen

jo kisi ne kabhi dekhe na sune

wo tamashe wo fusun ab dekhen

aaj to yun gale lag jao ki bas

phir to jaane tumhein kab kab dekhen

lakh patthar sahi wo but 'anjum'

wo ghaDi hum se mile tab dekhen