chandni har shab ko karti hai kinara chandni

chāñdnī har shab ko kartī hai kinārā chāñdnī

tere ḳhātir muñh ko dikhlātī hai taarā chāñdnī

aaj mahtābī pe chaḌhtā hai vo bahr-e-sair-e-māh

jāntā huuñ kuchh tirā chamkā sitārā chāñdnī

be-zarūrat ḳhush nahīñ aatī jahāñ meñ koī chiiz

fasl-e-sarmā meñ nahīñ hotī gavārā chāñdnī

tū chaḌhā shab ko jo mahtābī pe bahr-e-chashm-e-bad

āsmāñ se utre karne ko utārā chāñdnī

vasl kī shab kā samā āñkhoñ meñ chhāyā hai mire

māh-rū dekhe na phir vaise dobārā chāñdnī

rote rote Dūbtā hai jab shab-e-furqat meñ dil

jāntā huuñ saaf dariyā kā kinārā chāñdnī

chandni har shab ko karti hai kinara chandni

tere KHatir munh ko dikhlati hai tara chandni

aaj mahtabi pe chaDhta hai wo bahr-e-sair-e-mah

jaanta hun kuchh tera chamka sitara chandni

be-zarurat KHush nahin aati jahan mein koi chiz

fasl-e-sarma mein nahin hoti gawara chandni

tu chaDha shab ko jo mahtabi pe bahr-e-chashm-e-bad

aasman se utre karne ko utara chandni

wasl ki shab ka sama aankhon mein chhaya hai mere

mah-ru dekhe na phir waise dobara chandni

rote rote Dubta hai jab shab-e-furqat mein dil

jaanta hun saf dariya ka kinara chandni