chandni jis ki dar-e-jaan pe hum aksar dekhen

chāñdnī jis kī dar-e-jāñ pe ham aksar dekheñ

kabhī us chāñd ko bhī haath se chhū kar dekheñ

kaise bhar leñ dar-o-dīvār pe āvezāñ haiñ

jis taraf dekheñ tirī yaad kā manzar dekheñ

kabhī bārish kī bhī rātoñ meñ na chamkī bijlī

yahī armān rahā ghar ko munavvar dekheñ

aañkh khul jaa.e to sahrā kī zamīñ par hoñ qadam

niiñd aa jaa.e to ḳhvāboñ meñ samundar dekheñ

TuuT jaane kā bhī imkān bahut hai is meñ

yuuñ kamānoñ kī tarah aap na khiñch kar dekheñ

shaam hote hī nikal aate haiñ taare 'fāḳhir'

ik sitāre kā magar rāsta shab-bhar dekheñ

chandni jis ki dar-e-jaan pe hum aksar dekhen

kabhi us chand ko bhi hath se chhu kar dekhen

kaise bhar len dar-o-diwar pe aawezan hain

jis taraf dekhen teri yaad ka manzar dekhen

kabhi barish ki bhi raaton mein na chamki bijli

yahi arman raha ghar ko munawwar dekhen

aankh khul jae to sahra ki zamin par hon qadam

nind aa jae to KHwabon mein samundar dekhen

TuT jaane ka bhi imkan bahut hai is mein

yun kamanon ki tarah aap na khinch kar dekhen

sham hote hi nikal aate hain tare 'faKHir'

ek sitare ka magar rasta shab-bhar dekhen