چاندنی پگھلی ہوئی ہر ایک پیمانے میں ہے

چاندنی پگھلی ہوئی ہر ایک پیمانے میں ہے

روشنی ہی روشنی گویا کہ میخانے میں ہے

فصل گل بھی آ گئی اودی گھٹا بھی چھا گئی

عذر اب اے دوست کیا تجھ کو چلے آنے میں ہے

جا بجا ہے داستان گل میں شبنم کا بیان

میرا افسانہ بھی شامل تیرے افسانے میں ہے

مرنے والوں ہی سے ہے اے زندگی تیرا وقار

فصل گل کی آبرو پھولوں کے مرجھانے میں ہے

ان بہاروں میں کبھی شاید ہی ان کو دیکھ پائیں

جن بہاروں کا تصور دل کے ویرانے میں ہے