chandni raat hai aaj kitni sajal

chāñdnī raat hai aaj kitnī sajal

shāhrāh-e-mohabbat pe gaa.eñ ġhazal

ahl-e-ālam ko de kyoñ na deñ koī hal

mash.al-e-zindagī dhīme dhīme na jal

jāntā huuñ maiñ ye rasm-e-dār-o-rasan

do qadam haath meñ haath le ke tū chal

kaun jaagā hai yuuñ raat pichhle pahar

aañkh meñ ashk haiñ aur laboñ par ġhazal

regzār-e-ġham-e-zindagī se guzar

dekhte dekhte ḳhvāb-e-sub.h-e-azal

tū bhī nā-āshnā-e-sukūñ ho ga.ī

gardish-e-zindagī mujh se bach bach ke chal

apnī majbūri-e-dil bayāñ kyā karūñ

TūTte hī nahīñ hasratoñ ke mahal

haañ yahī kā.enāt-e-mohabbat hai bas

ik ġham-e-mustaqil ik hañsī be-mahal

mujh se 'iqbāl' ab koī kahtā to hai

merī ḳhātir girā merī ḳhātir sañbhal

chandni raat hai aaj kitni sajal

shahrah-e-mohabbat pe gaen ghazal

ahl-e-alam ko de kyon na den koi hal

mashal-e-zindagi dhime dhime na jal

jaanta hun main ye rasm-e-dar-o-rasan

do qadam hath mein hath le ke tu chal

kaun jaga hai yun raat pichhle pahar

aankh mein ashk hain aur labon par ghazal

regzar-e-gham-e-zindagi se guzar

dekhte dekhte KHwab-e-subh-e-azal

tu bhi na-ashna-e-sukun ho gai

gardish-e-zindagi mujh se bach bach ke chal

apni majburi-e-dil bayan kya karun

TuTte hi nahin hasraton ke mahal

han yahi kaenat-e-mohabbat hai bas

ek gham-e-mustaqil ek hansi be-mahal

mujh se 'iqbaal' ab koi kahta to hai

meri KHatir gira meri KHatir sanbhal