chandni raat hai main hun meri tanhai hai

chāñdnī raat hai maiñ huuñ mirī tanhā.ī hai

yaad aise meñ tirī dil meñ chalī aa.ī hai

vo daġhābāz hai zālim baḌā harjā.ī hai

phir bhī ye dil hai ki us kā hī tamannā.ī hai

vo mirī bazm-e-tasavvur meñ kuchh aise aa.e

jaise jannat mire āñgan meñ utar aa.ī hai

bāġh-e-firdaus hai sarqa tire husn-e-ruḳh kā

aur tafsīr-e-qayāmat tirī añgḌā.ī hai

na karūñ yaad maiñ tujh ko to ye dam ghuTtā hai

terī chāhat mujhe is moḌ pe le aa.ī hai

niiñd ojhal huī ḳhvāboñ kā safar ḳhatm huā

phir vahī maiñ vahī yādeñ vahī tanhā.ī hai

chandni raat hai main hun meri tanhai hai

yaad aise mein teri dil mein chali aai hai

wo daghabaz hai zalim baDa harjai hai

phir bhi ye dil hai ki us ka hi tamannai hai

wo meri bazm-e-tasawwur mein kuchh aise aae

jaise jannat mere aangan mein utar aai hai

bagh-e-firdaus hai sarqa tere husn-e-ruKH ka

aur tafsir-e-qayamat teri angDai hai

na karun yaad main tujh ko to ye dam ghuTta hai

teri chahat mujhe is moD pe le aai hai

nind ojhal hui KHwabon ka safar KHatm hua

phir wahi main wahi yaaden wahi tanhai hai