chandni raat mein ek bar use dekha tha

chāndnī raat meñ ik baar use dekhā thā

chāñd se bar-sar-e-paikār use dekhā thā

misl-e-ḳhurshīd numūdār vo ab tak na huā

āḳhirī baar sar-e-ġhār use dekhā thā

maiñ bhalā kaise bayāñ kartā sarāpā us kā

shab-e-yaldā pas-e-dīvār use dekhā thā

dil meñ utrī hī na thī raushnī us manzar kī

avvalīñ baar to bekār use dekhā thā

log kyuuñ koh o bayābāñ meñ use DhūñDte haiñ

maiñ ne to bar-sar-e-bāzār use dekhā thā

us ne kyā raat ko dekhā thā ye mālūm nahīñ

maiñ ne to naqsh-ba-dīvār use dekhā thā

us kī āñkhoñ meñ chamak ḳhvāb kī ye kaisī hai

raat bhar charḳh ne bedār use dekhā thā

chandni raat mein ek bar use dekha tha

chand se bar-sar-e-paikar use dekha tha

misl-e-KHurshid numudar wo ab tak na hua

aaKHiri bar sar-e-ghaar use dekha tha

main bhala kaise bayan karta sarapa us ka

shab-e-yalda pas-e-diwar use dekha tha

dil mein utri hi na thi raushni us manzar ki

awwalin bar to bekar use dekha tha

log kyun koh o bayaban mein use DhunDte hain

main ne to bar-sar-e-bazar use dekha tha

us ne kya raat ko dekha tha ye malum nahin

main ne to naqsh-ba-diwar use dekha tha

us ki aankhon mein chamak KHwab ki ye kaisi hai

raat bhar charKH ne bedar use dekha tha