chandni raat mein usne mujhe tanha rakkha

chāñdnī raat meñ us ne mujhe tanhā rakkhā

chāñd se bāteñ huiiñ mujh ko tarastā rakkhā

apne ġham-ḳhāne ko yādoñ se sajāyā ham ne

niiñd se phir na kabhī ḳhvāb kā rishta rakkhā

vo jo kahtā thā kabhī saath na chhoḌegā mirā

us ne sūraj kī tarah mujh ko bhī jaltā rakkhā

talḳh socheñ haiñ ki har baar bhaTak jaatī haiñ

us mohabbat ne bhī ham ko na kahīñ kā rakkhā

ai dil-e-ḳhasta maiñ māñgūñ bhī to kyā tere liye

tū ne ḳhud hī to zamāne se judā sā rakkhā

uTh khaḌī hotī hai har baar baġhāvat kar ke

naam beTī kā bhī jis maañ ne malāla rakkhā

vo jo mausam kī tarah ḳhud ko badal letā thā

mujh se rishta bhī kuchh us ne thā havā sā rakhā

phir mire shahr kī fōtpath pe tasvīr banī

maañ kī āġhosh meñ beTe kā hai lāsha rakkhā

ab to qismat se shikāyat na zamāne se gila

dukh to ye hai ki mujhe tū ne hī rusvā rakkhā

de de ḳhairāt mohabbat kī kabhī tū bhī mujhe

sāmne tere mire dil kā hai kaasa rakkhā

jab bhī tanqīd kisī par kabhī karnā chāhī

sāmne dil ke ḳhud apnā bhī sarāpā rakkhā

māh-o-anjum kī ziyā bhī ho muqaddar us kā

ziist meñ jis ne mirī aaj añdherā rakkhā

shahr-e-dil meñ hī basāyā hai nasheman apnā

ghar ke naqshe meñ tirī yaad kā naqsha rakkhā

sehn-e-gulshan meñ na.e phuul khilā karte haiñ

ik tirā naam 'tarannum' ne jo ġhuncha rakkhā

chandni raat mein us ne mujhe tanha rakkha

chand se baaten huin mujh ko tarasta rakkha

apne gham-KHane ko yaadon se sajaya hum ne

nind se phir na kabhi KHwab ka rishta rakkha

wo jo kahta tha kabhi sath na chhoDega mera

us ne suraj ki tarah mujh ko bhi jalta rakkha

talKH sochen hain ki har bar bhaTak jati hain

us mohabbat ne bhi hum ko na kahin ka rakkha

ai dil-e-KHasta main mangun bhi to kya tere liye

tu ne KHud hi to zamane se juda sa rakkha

uTh khaDi hoti hai har bar baghawat kar ke

nam beTi ka bhi jis man ne malala rakkha

wo jo mausam ki tarah KHud ko badal leta tha

mujh se rishta bhi kuchh us ne tha hawa sa rakha

phir mere shahr ki footpath pe taswir bani

man ki aaghosh mein beTe ka hai lasha rakkha

ab to qismat se shikayat na zamane se gila

dukh to ye hai ki mujhe tu ne hi ruswa rakkha

de de KHairaat mohabbat ki kabhi tu bhi mujhe

samne tere mere dil ka hai kasa rakkha

jab bhi tanqid kisi par kabhi karna chahi

samne dil ke KHud apna bhi sarapa rakkha

mah-o-anjum ki ziya bhi ho muqaddar us ka

zist mein jis ne meri aaj andhera rakkha

shahr-e-dil mein hi basaya hai nasheman apna

ghar ke naqshe mein teri yaad ka naqsha rakkha

sehn-e-gulshan mein nae phul khila karte hain

ek tera nam 'tarannum' ne jo ghuncha rakkha