chaar din ke jism ko mehman kahun

chaar din ke jism ko mehmāñ kahūñ

yā kisī panchhī kā ik zindāñ kahūñ

'aql rakhtā huuñ to maiñ banda-navāz

aap kī har baat par kyoñ haañ kahūñ

dūsrī duniyā se aa jā ḳhvāb meñ

tū mujhe beTā kahe maiñ maañ kahūñ

jaan luuñ insāniyat kyā chiiz hai

ḳhud ko phir ai zindagī insāñ kahūñ

mil gayā hai mujh ko merā hausla

aage har mushkil ko ab āsāñ kahūñ

jab bhī aa.ī hai jhiñjhoḌā hai mujhe

kyoñ na us kī yaad ko tūfāñ kahūñ

mo'tabar 'hashmat' koī miltā nahīñ

jis ko apnā dost apnī jaañ kahūñ

chaar din ke jism ko mehman kahun

ya kisi panchhi ka ek zindan kahun

'aql rakhta hun to main banda-nawaz

aap ki har baat par kyon han kahun

dusri duniya se aa ja KHwab mein

tu mujhe beTa kahe main man kahun

jaan lun insaniyat kya chiz hai

KHud ko phir ai zindagi insan kahun

mil gaya hai mujh ko mera hausla

aage har mushkil ko ab aasan kahun

jab bhi aai hai jhinjhoDa hai mujhe

kyon na us ki yaad ko tufan kahun

mo'tabar 'hashmat' koi milta nahin

jis ko apna dost apni jaan kahun