چار دن کے جسم کو مہماں کہوں

چار دن کے جسم کو مہماں کہوں

یا کسی پنچھی کا اک زنداں کہوں

عقل رکھتا ہوں تو میں بندہ نواز

آپ کی ہر بات پر کیوں ہاں کہوں

دوسری دنیا سے آ جا خواب میں

تو مجھے بیٹا کہے میں ماں کہوں

جان لوں انسانیت کیا چیز ہے

خود کو پھر اے زندگی انساں کہوں

مل گیا ہے مجھ کو میرا حوصلہ

آگے ہر مشکل کو اب آساں کہوں

جب بھی آئی ہے جھنجھوڑا ہے مجھے

کیوں نہ اس کی یاد کو طوفاں کہوں

معتبر حشمتؔ کوئی ملتا نہیں

جس کو اپنا دوست اپنی جاں کہوں