chaar din ki zindagi dozaKH bhi hai jannat bhi hai

chaar din kī zindagī dozaḳh bhī hai jannat bhī hai

dard bhī hai ġham bhī hai rāhat bhī hai 'ishrat bhī hai

zaḳhm khā kar bhūlnā āsāñ nahīñ hotā magar

zaḳhm khā kar bhuul jaane kī hameñ 'ādat bhī hai

gāhe-gāhe zindagī kī sard rātoñ ke liye

mai kī ḳhvāhish bhī sulagte jism kī hājat bhī hai

aap ne is silsile meñ ġhaur farmāyā nahīñ

merī rusvā.ī se paidā aap kī shohrat bhī hai

kal ḳhudā mā'lūm kyā andāz ho hālāt kā

aaj tanhā.ī bhī hai mausam bhī hai fursat bhī hai

dil lagā kar jaan bhī denā mirī ḳhaslat rahī

dil lagā kar bhuul jaanā aap kī fitrat bhī hai

'dard' sāhab aap kis ġham se pareshāñ ho ga.e

zindagī meñ ġham bhī hai hasrat bhī hai aafat bhī hai

chaar din ki zindagi dozaKH bhi hai jannat bhi hai

dard bhi hai gham bhi hai rahat bhi hai 'ishrat bhi hai

zaKHm kha kar bhulna aasan nahin hota magar

zaKHm kha kar bhul jaane ki hamein 'adat bhi hai

gahe-gahe zindagi ki sard raaton ke liye

mai ki KHwahish bhi sulagte jism ki hajat bhi hai

aap ne is silsile mein ghaur farmaya nahin

meri ruswai se paida aap ki shohrat bhi hai

kal KHuda ma'lum kya andaz ho haalat ka

aaj tanhai bhi hai mausam bhi hai fursat bhi hai

dil laga kar jaan bhi dena meri KHaslat rahi

dil laga kar bhul jaana aap ki fitrat bhi hai

'dard' sahab aap kis gham se pareshan ho gae

zindagi mein gham bhi hai hasrat bhi hai aafat bhi hai