چار سو بارود کی بو چار سو خوف و ہراس

چار سو بارود کی بو چار سو خوف و ہراس

بند دروازوں کے پیچھے مرد و زن سب بد حواس

اس کے وعدوں پر نہ کر تعمیر آشا کا محل

ریت کے ٹیلے پہ کیوں رکھتا ہے اس گھر کی اساس

سب امیر شہر کے ظلم و ستم سے جاں بہ لب

سب امیر شہر کے آگے مگر محو سپاس

یوں سیاسی فیصلوں نے عمر بھر روندا ہمیں

اس زمین علم و فن میں ہم اگے جیسے کہ گھاس

اپنے ہی اعمال سے لکھتے ہیں ہم اپنا نصیب

اپنے کاندھوں پر اٹھا رکھا ہے خود اپنا کراس

آؤ اپنائیں مروت دوستی انس و وفا

آؤ بھر لیں زندگی میں رنگ رس خوشبو مٹھاس

بڑھ گیا اس پار لے کر ناؤ وہ اپنی شبابؔ

میں کھڑا ہی رہ گیا تنہا لب ساحل اداس