chaar-su barud ki bu chaar-su KHauf-o-hiras

chār-sū bārūd kī bū chār-sū ḳhauf-o-hirās

band darvāzoñ ke pīchhe mard-o-zan sab bad-havās

us ke va.adoñ par na kar ta.amīr aashā kā mahal

ret ke Tiile pe kyoñ rakhtā hai is ghar kī asaas

sab amīr-e-shahr ke zulm-o-sitam se jāñ-ba-lab

sab amīr-e-shahr ke aage magar mahv-e-sipās

yuuñ siyāsī faisloñ ne umr bhar rauñdā hameñ

is zamīn-e-ilm-o-fan meñ ham uge jaise ki ghaas

apne hī a.amāl se likhte haiñ ham apnā nasīb

apne kāñdhoñ par uThā rakkhā hai ḳhud apnā cross

aao apnā.eñ muravvat dostī uns-o-vafā

aao bhar leñ zindagī meñ rang ras ḳhushbū miThās

baḌh gayā us paar le kar naav vo apnī 'shabāb'

maiñ khaḌā hī rah gayā tanhā lab-e-sāhil udaas

chaar-su barud ki bu chaar-su KHauf-o-hiras

band darwazon ke pichhe mard-o-zan sab bad-hawas

us ke wadon par na kar tamir aasha ka mahal

ret ke Tile pe kyon rakhta hai is ghar ki asas

sab amir-e-shahr ke zulm-o-sitam se jaan-ba-lab

sab amir-e-shahr ke aage magar mahw-e-sipas

yun siyasi faislon ne umr bhar raunda hamein

is zamin-e-ilm-o-fan mein hum uge jaise ki ghas

apne hi aamal se likhte hain hum apna nasib

apne kandhon par uTha rakkha hai KHud apna cross

aao apnaen murawwat dosti uns-o-wafa

aao bhar len zindagi mein rang ras KHushbu miThas

baDh gaya us par le kar naw wo apni 'shabab'

main khaDa hi rah gaya tanha lab-e-sahil udas