چار سو بزم سخن میں یہ منادی ہو گئی

چار سو بزم سخن میں یہ منادی ہو گئی

اک غزل کی آج اک شاعر سے شادی ہو گئی

جب سنوارا میرؔ مومنؔ اور غالبؔ نے اسے

تو غزل صنف سخن کی شاہ زادی ہو گئی

حسن اس کا منفرد ہے سب حسینوں سے جدا

جو غزل اس پر کہی وہ انفرادی ہو گئی

یاد اس کو نہ کروں تو خوب گھبراتا ہے دل

زندگی یاد غم جاناں کی عادی ہو گئی

جب وہ میری روح میں داخل ہوئی میں جی اٹھا

خوش نما رنگین میرے دل کی وادی ہو گئی

یہ غزل آمد کی ہے یعنی خدا کی دین ہے

بس میرے فن سے ذرا سی یہ خرادی ہو گئی

اس کا قد میری نظر میں ہو گیا اظہرؔ جی کم

جب سے وہ لڑکی سیاسی اقتصادی ہو گئی