chaar-su raqs-kunan hasrat-e-mismar ke sath

chār-sū raqs-kunāñ hasrat-e-mismār ke saath

umr Dhal jaa.e tirī yaad kī dīvār ke saath

pahle aatī hai hunar meñ kisī tāsīr kī bū

shā.erī aatī hai phir lahja-o-guftār ke saath

vo bhī to shahr-e-tamannā se nahīñ lauTe haiñ

ham bhī mahfil meñ haiñ chup qalb-e-azādār ke saath

chārāgar merī tabī.at kā banāte haiñ mazāq

ye sulūk achchhā nahīñ aap ke bīmār ke saath

ek saaya hai tire qad ke barābar koī

chal rahā hai jo mirī hastī-e-bezār ke saath

is liye aur kisī jalve pe āñkheñ na jamīñ

jashn-e-bīnā.ī kareñge tire dīdār ke saath

chaar-su raqs-kunan hasrat-e-mismar ke sath

umr Dhal jae teri yaad ki diwar ke sath

pahle aati hai hunar mein kisi tasir ki bu

shaeri aati hai phir lahja-o-guftar ke sath

wo bhi to shahr-e-tamanna se nahin lauTe hain

hum bhi mahfil mein hain chup qalb-e-azadar ke sath

chaaragar meri tabiat ka banate hain mazaq

ye suluk achchha nahin aap ke bimar ke sath

ek saya hai tere qad ke barabar koi

chal raha hai jo meri hasti-e-bezar ke sath

is liye aur kisi jalwe pe aankhen na jamin

jashn-e-binai karenge tere didar ke sath