chaar-su shahr mein maqtal ka saman hai ab ke

chār-sū shahr meñ maqtal kā samāñ hai ab ke

apne saa.e pe bhī qātil kā gumāñ hai ab ke

jo kabhī shahr meñ ḳhurshīd-ba-kaf bhartā thā

koī batlā.e ki vo shaḳhs kahāñ hai ab ke

kahkashāñ lafzoñ kī hoñToñ pe bikharne diije

duur tak zehn kī galiyoñ meñ dhuāñ hai ab ke

log āñkhoñ meñ na.e ḳhvāb liye phirte haiñ

kuchh na hone pe bhī hone kā gumāñ hai ab ke

mere maazī ne mujhe yaad kiyā hai shāyad

ik ḳhalish hai ki qarīb-e-rag-e-jāñ hai ab ke

vaqt kyā vaqt se ummīd-e-karam kyā 'ḳhusrav'

vaqt hālāt kā ḳhud marsiyāñ-ḳhvāñ hai ab ke

chaar-su shahr mein maqtal ka saman hai ab ke

apne sae pe bhi qatil ka guman hai ab ke

jo kabhi shahr mein KHurshid-ba-kaf bharta tha

koi batlae ki wo shaKHs kahan hai ab ke

kahkashan lafzon ki honTon pe bikharne dije

dur tak zehn ki galiyon mein dhuan hai ab ke

log aankhon mein nae KHwab liye phirte hain

kuchh na hone pe bhi hone ka guman hai ab ke

mere mazi ne mujhe yaad kiya hai shayad

ek KHalish hai ki qarib-e-rag-e-jaan hai ab ke

waqt kya waqt se ummid-e-karam kya 'KHusraw'

waqt haalat ka KHud marsiyan-KHwan hai ab ke