chaaragar chup hain kyun ilaj karen

chāragar chup haiñ kyuuñ 'ilāj kareñ

kuchh to apne kiye kī laaj kareñ

un se kis ne kahā thā vo mujh ko

fard-e-hastī meñ indirāj kareñ

roz khaTkā sā dil meñ rahtā hai

dekhiye kyā vo hukm aaj kareñ

fursat-e-zīst kam hī kaam bahut

kal jo karnā hai ham ko aaj kareñ

chāragar bhī na kyā kareñge yaad

kar sakeñ jis qadar 'ilāj kareñ

sab usī kī sī kah rahe haiñ 'azīz'

kis se ham arz-e-ehtiyāj kareñ

chaaragar chup hain kyun 'ilaj karen

kuchh to apne kiye ki laj karen

un se kis ne kaha tha wo mujh ko

fard-e-hasti mein indiraj karen

roz khaTka sa dil mein rahta hai

dekhiye kya wo hukm aaj karen

fursat-e-zist kam hi kaam bahut

kal jo karna hai hum ko aaj karen

chaaragar bhi na kya karenge yaad

kar saken jis qadar 'ilaj karen

sab usi ki si kah rahe hain 'aziz'

kis se hum arz-e-ehtiyaj karen