chaaron jaanib pagal-KHane lagte hain

chāroñ jānib pāgal-ḳhāne lagte haiñ

mausam aise hosh uḌāne lagte haiñ

malba girne lagtā hai sab kamre kā

jab terī tasvīr jalāne lagte haiñ

ghabrā ke is daur ke vahshī insāñ se

dīvāroñ ko raaz batāne lagte haiñ

aañkh uThā kar jab bhī dekhūñ peḌoñ ko

mujh ko mere dost purāne lagte haiñ

zehn meñ maazī jab bhī ghūmne lagtā hai

aañkh meñ kitne aañsū aane lagte haiñ

dil ke hāthoñ ho ke ham majbūr sadā

armānoñ kī laash uThāne lagte haiñ

patthar jaisī duniyā hai ḳhud-ġharzī hai

us ko kyuuñ kar dard sunāne lagte haiñ

saath mire vo mil kar chāñd sitāre bhī

hijr meñ tere niir bahāne lagte haiñ

yaar 'nabīl' unheñ maiñ jitnā bhūltā huuñ

mujh ko yaad vo utnā aane lagte haiñ

chaaron jaanib pagal-KHane lagte hain

mausam aise hosh uDane lagte hain

malba girne lagta hai sab kamre ka

jab teri taswir jalane lagte hain

ghabra ke is daur ke wahshi insan se

diwaron ko raaz batane lagte hain

aankh uTha kar jab bhi dekhun peDon ko

mujh ko mere dost purane lagte hain

zehn mein mazi jab bhi ghumne lagta hai

aankh mein kitne aansu aane lagte hain

dil ke hathon ho ke hum majbur sada

armanon ki lash uThane lagte hain

patthar jaisi duniya hai KHud-gharzi hai

us ko kyun kar dard sunane lagte hain

sath mere wo mil kar chand sitare bhi

hijr mein tere nir bahane lagte hain

yar 'nabil' unhen main jitna bhulta hun

mujh ko yaad wo utna aane lagte hain