چڑھا جو دل پہ مرے ان کے انتظار کا رنگ

چڑھا جو دل پہ مرے ان کے انتظار کا رنگ

خزاں میں ڈوب گیا موسم بہار کا رنگ

بدل گیا جو مقدر تو ہر کوئی بدلا

بگڑ گیا بہر انداز اعتبار کا رنگ

مرے ہی دل کی اداسی ہے سارے عالم پر

شفق میں آنے لگا چشم اشکبار کا رنگ

گل و کلی سے گلستاں کی چرخ گردوں تک

ہر ایک شے سے نمایاں ہے حسن یار کا رنگ

کسی کی چشم فسوں ساز کے کرشمے ہیں

دل و دماغ پہ چھانے لگا خمار کا رنگ

کبھی نہ ناز کرو چار دن کی خوشیوں پر

بدل نہ جائے خزاں سے کہیں بہار کا رنگ

نسیمؔ اک مری ہستی میں سب ہی مضمر ہیں

وفا کا رنگ ہے اور جبر و اختیار کا رنگ