chaDha jo dil pe mere un ke intizar ka rang

chaḌhā jo dil pe mire un ke intizār kā rang

ḳhizāñ meñ Duub gayā mausam-e-bahār kā rang

badal gayā jo muqaddar to har koī badlā

bigaḌ gayā bahar-andāz e.atibār kā rang

mire hī dil kī udāsī hai saare aalam par

shafaq meñ aane lagā chashm-e-ashk-bār kā rang

gul-o-kalī se gulistāñ kī charḳh-e-gardūñ tak

har ek shai se numāyāñ hai husn-e-yār kā rang

kisī kī chashm-e-fusūñ-sāz ke karishme haiñ

dil-o-dimāġh pe chhāne lagā ḳhumār kā rang

kabhī na naaz karo chaar din kī ḳhushiyoñ par

badal na jaa.e ḳhizāñ se kahīñ bahār kā rang

'nasīm' ik mirī hastī meñ sab hī muzmar haiñ

vafā kā rang hai aur jabr-o-iḳhtiyār kā rang

chaDha jo dil pe mere un ke intizar ka rang

KHizan mein Dub gaya mausam-e-bahaar ka rang

badal gaya jo muqaddar to har koi badla

bigaD gaya bahar-andaz eatibar ka rang

mere hi dil ki udasi hai sare aalam par

shafaq mein aane laga chashm-e-ashk-bar ka rang

gul-o-kali se gulistan ki charKH-e-gardun tak

har ek shai se numayan hai husn-e-yar ka rang

kisi ki chashm-e-fusun-saz ke karishme hain

dil-o-dimagh pe chhane laga KHumar ka rang

kabhi na naz karo chaar din ki KHushiyon par

badal na jae KHizan se kahin bahaar ka rang

'nasim' ek meri hasti mein sab hi muzmar hain

wafa ka rang hai aur jabr-o-iKHtiyar ka rang