chaDha ke chaak pe jo chahe wo bana mujhko

chaḌhā ke chaak pe jo chāhe vo banā mujh ko

ai kūza-gar na banā vaqt kā ḳhudā mujh ko

na aa.ī raas tire husn kī fazā mujh ko

tamām 'umr milī 'ishq kī sazā mujh ko

usūl-e-‘ishq kī pāband thī zabāñ merī

hazār baar kahā tū ne bevafā mujh ko

faroġh detā hai vo dam-ba-dam junūñ ko mire

jahāñ ye detā nahīñ hosh kī davā mujh ko

kaThin safar meñ ye āsāniyāñ huiiñ kaise

shikasta dil koī detā hai kyā du'ā mujh ko

bachā sako to bachā lo tum apnā sar 'kausar'

junūn-e-shauq meñ har karb hai ravā mujh ko

chaDha ke chaak pe jo chahe wo bana mujh ko

ai kuza-gar na bana waqt ka KHuda mujh ko

na aai ras tere husn ki faza mujh ko

tamam 'umr mili 'ishq ki saza mujh ko

usul-e-‘ishq ki paband thi zaban meri

hazar bar kaha tu ne bewafa mujh ko

farogh deta hai wo dam-ba-dam junun ko mere

jahan ye deta nahin hosh ki dawa mujh ko

kaThin safar mein ye aasaniyan huin kaise

shikasta dil koi deta hai kya du'a mujh ko

bacha sako to bacha lo tum apna sar 'kausar'

junun-e-shauq mein har karb hai rawa mujh ko