chaDha pani zara tu apne dhaare se nikal aaya

chaḌhā paanī zarā tū apne dhāre se nikal aayā

achānak ik jagah dariyā kināre se nikal aayā

bahut raushan thā vo aur āḳhir-e-shab ke ufuq par thā

mire hī sāmne din us sitāre se nikal aayā

mujhe apne badan kā ḳhas jalānā thā zamistāñ meñ

mirā ye kaam dil hī ke sharāre se nikal aayā

tah-e-dariyā paḌe rahnā thā maiñ ne bhī guhar-sūrat

thī mauj-e-tund ik jis ke sahāre se nikal aayā

safar ko ik jagah se kar liyā kuchh lambā aur mushkil

ġhalat rasta thā vo jis ke ishāre se nikal aayā

hisāb-e-dostāñ karne hī se mālūm ye hogā

ḳhasāre meñ huuñ yā ab maiñ ḳhasāre se nikal aayā

bahut mushkil thā kuchh us husn kī tārīf meñ kahnā

mirā matlab magar ik isti.āre se nikal aayā

zamīn-e-dil ko bas thoḌe se paanī kī zarūrat thī

ye paanī ik guzarte abr paare se nikal aayā

mujhe phir qaid kar lenā thā us ke husn ne 'shāhīñ'

munāsib vaqt par maiñ ik nazāre se nikal aayā

chaDha pani zara tu apne dhaare se nikal aaya

achanak ek jagah dariya kinare se nikal aaya

bahut raushan tha wo aur aaKHir-e-shab ke ufuq par tha

mere hi samne din us sitare se nikal aaya

mujhe apne badan ka KHas jalana tha zamistan mein

mera ye kaam dil hi ke sharare se nikal aaya

tah-e-dariya paDe rahna tha main ne bhi guhar-surat

thi mauj-e-tund ek jis ke sahaare se nikal aaya

safar ko ek jagah se kar liya kuchh lamba aur mushkil

ghalat rasta tha wo jis ke ishaare se nikal aaya

hisab-e-dostan karne hi se malum ye hoga

KHasare mein hun ya ab main KHasare se nikal aaya

bahut mushkil tha kuchh us husn ki tarif mein kahna

mera matlab magar ek istiare se nikal aaya

zamin-e-dil ko bas thoDe se pani ki zarurat thi

ye pani ek guzarte abr pare se nikal aaya

mujhe phir qaid kar lena tha us ke husn ne 'shahin'

munasib waqt par main ek nazare se nikal aaya