chaDhe parwan chahe ishq ya na-kaam ho jae

chaḌhe parvān chāhe 'ishq yā nā-kām ho jaa.e

tumhāre chāhne vāloñ meñ apnā naam ho jaa.e

baḌā kohrām barpā hai hamāre ḳhāna-e-dil meñ

zarā tum muskurā do to hameñ ārām ho jaa.e

naqāb-e-ruḳh ulaT do tum to jaise din nikal aa.e

agar zulfoñ ko bikhrā do sunahrī shaam ho jaa.e

zabāñ ko kis liye goyā.ī kī taklīf deñ yaaro

agar āñkhoñ hī āñkhoñ meñ hamārā kaam ho jaa.e

raqīboñ kī samā'at ho rahī hai terī mahfil meñ

zarā sī baat ham kah deñ abhī kohrām ho jaa.e

na kuchh kahiye na kuchh suniye hamāre sāmne rahiye

kahīñ aisā na ho is zindagī kī shaam ho jaa.e

ḳhamoshī aisī chhā.ī hai hamāre suune āñgan meñ

kisī muflis ke ghar meñ jis tarah se shaam ho jaa.e

agar 'fārūq' tum ko munfarid rahnā hai duniyā meñ

vo rasta tark hī kar do jo rasta 'aam ho jaa.e

havas koī nahīñ 'fārūq' lekin chāhtā huuñ maiñ

ba-nām-e-shā'irī merā bhī thoḌā naam ho jaa.e

chaDhe parwan chahe 'ishq ya na-kaam ho jae

tumhaare chahne walon mein apna nam ho jae

baDa kohram barpa hai hamare KHana-e-dil mein

zara tum muskura do to hamein aaram ho jae

naqab-e-ruKH ulaT do tum to jaise din nikal aae

agar zulfon ko bikhra do sunahri sham ho jae

zaban ko kis liye goyai ki taklif den yaro

agar aankhon hi aankhon mein hamara kaam ho jae

raqibon ki sama'at ho rahi hai teri mahfil mein

zara si baat hum kah den abhi kohram ho jae

na kuchh kahiye na kuchh suniye hamare samne rahiye

kahin aisa na ho is zindagi ki sham ho jae

KHamoshi aisi chhai hai hamare sune aangan mein

kisi muflis ke ghar mein jis tarah se sham ho jae

agar 'faruq' tum ko munfarid rahna hai duniya mein

wo rasta tark hi kar do jo rasta 'am ho jae

hawas koi nahin 'faruq' lekin chahta hun main

ba-nam-e-sha'iri mera bhi thoDa nam ho jae