chaDhta suraj uDta baadal bahta dariya kuchh bhi nahin

chaḌhtā sūraj uḌtā bādal bahtā dariyā kuchh bhī nahīñ

saarā tamāshā mere liye hai lekin merā kuchh bhī nahīñ

un kī nannhī uñglī to ab computer se khele hai

aaj ke bachchoñ kī nazroñ meñ chandā-māmā kuchh bhī nahīñ

mere pyāse hoñToñ hī se bas dariyā kī qīmat hai

tishna-labī kā muul hai saarā varna dariyā kuchh bhī nahīñ

us ne ham ko haldī kyā dī ham pansārī ban baiThe

lene vaale mālik Thahre dene vaalā kuchh bhī nahīñ

terā merā karte karte 'umr guzārī jaatī hai

sach to ye hai terā merā merā terā kuchh bhī nahīñ

ham nazroñ nazroñ meñ apne dil kā saudā kar baiThe

sochā-samjhā kuchh bhī nahīñ aur dekhā-bhālā kuchh bhī nahīñ

in rishtoñ kī bhiiḌ meñ aksar mujh ko aisā lagtā hai

saarī duniyā apnī sagī hai lekin apnā kuchh bhī nahīñ

laakh kareñ ham sajda zamīñ par laakh jabīñ ko ghis Dāleñ

saaf na ho gar niyyat 'gauhar' to phir sajda kuchh bhī nahīñ

chaDhta suraj uDta baadal bahta dariya kuchh bhi nahin

sara tamasha mere liye hai lekin mera kuchh bhi nahin

un ki nannhi ungli to ab computer se khele hai

aaj ke bachchon ki nazron mein chanda-mama kuchh bhi nahin

mere pyase honTon hi se bas dariya ki qimat hai

tishna-labi ka mul hai sara warna dariya kuchh bhi nahin

us ne hum ko haldi kya di hum pansari ban baiThe

lene wale malik Thahre dene wala kuchh bhi nahin

tera mera karte karte 'umr guzari jati hai

sach to ye hai tera mera mera tera kuchh bhi nahin

hum nazron nazron mein apne dil ka sauda kar baiThe

socha-samjha kuchh bhi nahin aur dekha-bhaala kuchh bhi nahin

in rishton ki bhiD mein aksar mujh ko aisa lagta hai

sari duniya apni sagi hai lekin apna kuchh bhi nahin

lakh karen hum sajda zamin par lakh jabin ko ghis Dalen

saf na ho gar niyyat 'gauhar' to phir sajda kuchh bhi nahin