chahchahati bolti aankhon ka uncha shor hai

chahchahātī boltī āñkhoñ kā ūñchā shor hai

shaam ke dhuñdle shajar par kitnā achchhā shor hai

āshnā.ī kā safar thā aur kitnī ḳhāmushī

vāpsī kā rāsta hai aur kitnā shor hai

zaat kī tanhā.ī meñ koī nahīñ hotā sharīk

band haiñ gaaḌī ke shīshe andar apnā shor hai

duur ke dālān se aatī sadāoñ kī mahak

aur ubalte chā.valoñ kā dhīmā dhīmā shor hai

vo hai ḳhālī ghar kī sūrat meñ bharā bāzār huuñ

us ke jaisī ḳhāmushī hai mere jaisā shor hai

shahr se behtar to vīrāne kā sannāTā hī thā

kaisī kaisī boliyāñ haiñ kaisā kaisā shor hai

ḳhatm kar Dālegā ik pal meñ sukūt-e-be-dilī

khel ke maidān se aayā hai zinda shor hai

raat ke pichhle pahar kā be-sadā jangal samajh

merī ḳhāmoshī ke andar be-tahāshā shor hai

is taraf aatā nahīñ koī ki us se pūchh luuñ

āsmāñ ke paar se uThtā ye kaisā shor hai

kaan meñ kohrām dil meñ khaultī āvāz kā

log lab-basta haiñ chehroñ se ubaltā shor hai

hāo-hū fariyād chīḳheñ nāla-e-dil-dād-gāñ

jhuuT haiñ saare dilāse aur sachchā shor hai

chahchahati bolti aankhon ka uncha shor hai

sham ke dhundle shajar par kitna achchha shor hai

aashnai ka safar tha aur kitni KHamushi

wapsi ka rasta hai aur kitna shor hai

zat ki tanhai mein koi nahin hota sharik

band hain gaDi ke shishe andar apna shor hai

dur ke dalan se aati sadaon ki mahak

aur ubalte chawalon ka dhima dhima shor hai

wo hai KHali ghar ki surat mein bhara bazar hun

us ke jaisi KHamushi hai mere jaisa shor hai

shahr se behtar to virane ka sannaTa hi tha

kaisi kaisi boliyan hain kaisa kaisa shor hai

KHatm kar Dalega ek pal mein sukut-e-be-dili

khel ke maidan se aaya hai zinda shor hai

raat ke pichhle pahar ka be-sada jangal samajh

meri KHamoshi ke andar be-tahasha shor hai

is taraf aata nahin koi ki us se puchh lun

aasman ke par se uThta ye kaisa shor hai

kan mein kohram dil mein khaulti aawaz ka

log lab-basta hain chehron se ubalta shor hai

hao-hu fariyaad chiKHen nala-e-dil-dad-gan

jhuT hain sare dilase aur sachcha shor hai