chain se kaTti thi kuchh gham se sarokar na tha

chain se kaTtī thī kuchh ġham se sarokār na thā

vo bhī kyā din the ki jab ishq kā āzār na thā

be-sabab aur ye ilzām lagā.eñ kaise

qābil-e-rahm hamārā hī dil-e-zār na thā

ishq karte hī hue apne parā.e dushman

baat karne kā koī mujh se ravādār na thā

terī is zid ne mohabbat meñ mujhe meT diyā

shaġhl achchhā ye tirā dīda-e-ḳhūñ-bār na thā

be-vafā dil ke ye bartāv na bhūleñge kabhī

goyā ham se kabhī kuchh us ko sarokār na thā

de duā mujh ko shab-e-ġham tujhe mehmān kiyā

koī duniyā meñ tirā aur talabgār na thā

ham se jab tak kī rahī rasm-e-mohabbat qaa.em

is tarah aap kā charchā sar-e-bāzār na thā

qais ke baad junūñ kī mujhe jāgīr milī

dūsrā aur koī dasht kā haqdār na thā

ḳhatm qissa karo insāf se itnā kah do

ham se va.ada na thā ham se koī iqrār na thā

ham ko shikva nahīñ kuchh un se jafā kā aslan

asl ye hai ki hameñ ishq sazā-vār na thā

ab rasā.ī bhī to us bazm meñ āsān nahīñ

pahle aisā to kabhī majma-e-aġhyār na thā

saḳhtiyāñ jhelnā farhād bahut mushkil thā

jaan denā to rah-e-ishq meñ dushvār na thā

vā.izo koī sabab us kā batā sakte ho

mustahiq ḳhuld kā kyoñ rind-e-qadah-ḳhvār na thā

ye bhī ik chheḌ thī jo pūchh liyā mujh se mizāj

mudda.ā aap kā kuchh pursish-e-bīmār na thā

ham kahāñ ḳhvāhish-e-jannat meñ bhaTakte phirte

jī ke bahlāne ko kyā kūcha-e-dildār na thā

pūchhte bhī vo agar mujh se na kahte bantā

mudda.ā aisā thā jo qābil-e-iz.hār na thā

maiñ bhī kuchh arz karūñ aap jo nārāz na hoñ

paas va.ade kā kabhī aap ko sarkār na thā

sham.a par ho gayā kis shauq se parvāna nisār

kaam himmat ke liye koī bhī dushvār na thā

nazr-e-dil kar diyā aur jaan bhī sadqe kar dī

phir bhī maiñ aap ke nazdīk vafādār na thā

is tarah suntā huuñ gulshan kī qafas meñ bāteñ

jaise dekhā kabhī maiñ ne gul-o-gulzār na thā

jhelnā paḌ ga.e ulfat meñ masā.ib aise

jin se vāqif na thā pahle se ḳhabar-dār na thā

apne begāne kī taḳhsīs na thī kuchh 'ishrat'

kaun thā ishq meñ jo darpai-e-āzār na thā

chain se kaTti thi kuchh gham se sarokar na tha

wo bhi kya din the ki jab ishq ka aazar na tha

be-sabab aur ye ilzam lagaen kaise

qabil-e-rahm hamara hi dil-e-zar na tha

ishq karte hi hue apne parae dushman

baat karne ka koi mujh se rawadar na tha

teri is zid ne mohabbat mein mujhe meT diya

shaghl achchha ye tera dida-e-KHun-bar na tha

be-wafa dil ke ye bartaw na bhulenge kabhi

goya hum se kabhi kuchh us ko sarokar na tha

de dua mujh ko shab-e-gham tujhe mehman kiya

koi duniya mein tera aur talabgar na tha

hum se jab tak ki rahi rasm-e-mohabbat qaem

is tarah aap ka charcha sar-e-bazar na tha

qais ke baad junun ki mujhe jagir mili

dusra aur koi dasht ka haqdar na tha

KHatm qissa karo insaf se itna kah do

hum se wada na tha hum se koi iqrar na tha

hum ko shikwa nahin kuchh un se jafa ka aslan

asl ye hai ki hamein ishq saza-war na tha

ab rasai bhi to us bazm mein aasan nahin

pahle aisa to kabhi majma-e-aghyar na tha

saKHtiyan jhelna farhad bahut mushkil tha

jaan dena to rah-e-ishq mein dushwar na tha

waizo koi sabab us ka bata sakte ho

mustahiq KHuld ka kyon rind-e-qadah-KHwar na tha

ye bhi ek chheD thi jo puchh liya mujh se mizaj

muddaa aap ka kuchh pursish-e-bimar na tha

hum kahan KHwahish-e-jannat mein bhaTakte phirte

ji ke bahlane ko kya kucha-e-dildar na tha

puchhte bhi wo agar mujh se na kahte banta

muddaa aisa tha jo qabil-e-izhaar na tha

main bhi kuchh arz karun aap jo naraaz na hon

pas wade ka kabhi aap ko sarkar na tha

shama par ho gaya kis shauq se parwana nisar

kaam himmat ke liye koi bhi dushwar na tha

nazr-e-dil kar diya aur jaan bhi sadqe kar di

phir bhi main aap ke nazdik wafadar na tha

is tarah sunta hun gulshan ki qafas mein baaten

jaise dekha kabhi main ne gul-o-gulzar na tha

jhelna paD gae ulfat mein masaib aise

jin se waqif na tha pahle se KHabar-dar na tha

apne begane ki taKHsis na thi kuchh 'ishrat'

kaun tha ishq mein jo darpai-e-azar na tha