chal aa ki dahr se kizb-o-riya kashid karen

chal aa ki dahr se kizb-o-riyā kashīd kareñ

kisī ke jurm se apnī sazā kashīd kareñ

chal aa ki ham bhī chaleñ paar is adam ke kahīñ

ḳhalā ko ḳhaam banā.eñ havā kashīd kareñ

ham aise ḳhāna-ba-doshoñ kī kyā hadeñ hoñgī

jo vaqt zehn meñ rakh kar jagah kashīd kareñ

chal apne chhoTe se ġham ko baḌhāvā dete raheñ

phir us ke pahlū se karb-o-balā kashīd kareñ

hameñ samajhne parakhne meñ log lag to ga.e

nahīñ hai vasf koī bhī to kyā kashīd kareñ

chal aa bashar ko kisī vasvase meñ jhoñk deñ aur

usī se ḳhauf banā.eñ ḳhudā kashīd kareñ

chal aa ki dahr se kizb-o-riya kashid karen

kisi ke jurm se apni saza kashid karen

chal aa ki hum bhi chalen par is adam ke kahin

KHala ko KHam banaen hawa kashid karen

hum aise KHana-ba-doshon ki kya haden hongi

jo waqt zehn mein rakh kar jagah kashid karen

chal apne chhoTe se gham ko baDhawa dete rahen

phir us ke pahlu se karb-o-bala kashid karen

hamein samajhne parakhne mein log lag to gae

nahin hai wasf koi bhi to kya kashid karen

chal aa bashar ko kisi waswase mein jhonk den aur

usi se KHauf banaen KHuda kashid karen