chal diye hum ai gham-e-alam widaa

chal diye ham ai ġham-e-ālam vidā.a

shor-e-mātam tā-kujā mātam vidā.a

jaate hī tere har ik kā kuuch hai

jaañ vidā.a o dil vidā.a o dam vidā.a

roz-e-mayyat bhī nahīñ kam iid se

pahle rehlat se huā har ġham vidā.a

hai qayāmat ek din us kā qayām

dil ko kar ai turra-e-ḳhush-ḳham vidā.a

us kā rasta kū-e-ġhair aur apnā ḳhuld

vo udhar ruḳhsat idhar haiñ ham vidā.a

ġhair kī ḳhātir hai to jaane bhī do

kījiye us ko ḳhush-o-ḳhurram vidā.a

haa.e re umr-e-ravāñ kā qāfila

har qadam har aan hai har dam vidā.a

kyuuñ na hoñ āġhosh-e-hasrat sub.h-o-shām

roz-o-shab aalam se hai aalam vidā.a

hai ba-qadr-e-hausla yaañ ittifāq

jaam se hargiz na hogā jam vidā.a

sun chukā huuñ maiñ tirā azm-e-safar

aañkh se merī na hogā nam vidā.a

hasrat-e-be-iḳhtiyārī dekhnā

tan se jaañ hotī hai kyā tham tham vidā.a

ab kahāñ sabr-o-qarār-o-tāb-o-hosh

saath hī is ke hue paiham vidā.a

lā ta.ayyun be nishānī ne kiyā

kījiye ārām ruḳhsat ram vidā.a

mohlat-e-rañg-e-chaman ḳhuuñ kyuuñ na ho

ho ga.ī jab fursat-e-shabnam vidā.a

ai 'qalaq' chaliye ki manzil duur hai

ho raheñge yaar sab bāham vidā.a

chal diye hum ai gham-e-alam widaa

shor-e-matam ta-kuja matam widaa

jate hi tere har ek ka kuch hai

jaan widaa o dil widaa o dam widaa

roz-e-mayyat bhi nahin kam id se

pahle rehlat se hua har gham widaa

hai qayamat ek din us ka qayam

dil ko kar ai turra-e-KHush-KHam widaa

us ka rasta ku-e-ghair aur apna KHuld

wo udhar ruKHsat idhar hain hum widaa

ghair ki KHatir hai to jaane bhi do

kijiye us ko KHush-o-KHurram widaa

hae re umr-e-rawan ka qafila

har qadam har aan hai har dam widaa

kyun na hon aaghosh-e-hasrat subh-o-sham

roz-o-shab aalam se hai aalam widaa

hai ba-qadr-e-hausla yan ittifaq

jam se hargiz na hoga jam widaa

sun chuka hun main tera azm-e-safar

aankh se meri na hoga nam widaa

hasrat-e-be-iKHtiyari dekhna

tan se jaan hoti hai kya tham tham widaa

ab kahan sabr-o-qarar-o-tab-o-hosh

sath hi is ke hue paiham widaa

la tayyun be nishani ne kiya

kijiye aaram ruKHsat ram widaa

mohlat-e-rang-e-chaman KHun kyun na ho

ho gai jab fursat-e-shabnam widaa

ai 'qalaq' chaliye ki manzil dur hai

ho rahenge yar sab baham widaa