chal kar na zulf-e-yar ko tu ai saba bigaD

chal kar na zulf-e-yār ko tū ai sabā bigāḌ

andher hogā us se agar ho gayā bigāḌ

āshiq ko har tarah hai musībat kā sāmnā

achchhā tirā milāp na achchhā tirā bigāḌ

maiñ kyuuñ karūñ kisī ko makīn-e-makān-e-dil

maiñ kyuuñ kahūñ kisī se ki tū ghar mirā bigāḌ

mauqūf ek do pe nahīñ yaar kā itaab

is se judā bigāḌ hai us se judā bigāḌ

hotī thī āshiqoñ meñ baḌe lutf se basar

baiThe-biThā.e aap ne kyuuñ kar liyā bigāḌ

aise marīz-e-ishq kā kis se ilaaj ho

paidā kare mizāj meñ jis ke davā bigāḌ

nāzuk-mizāj yaar kā bartāo kyā kahūñ

do din rahā milāp to barsoñ rahā bigāḌ

achchhoñ meñ aib bhī ho to dāḳhil hunar meñ hai

rakhtā hai sau banāv tirī zulf kā bigāḌ

achchhā huā 'jalīl' se tum saaf ho ga.e

aġhyār ne to Daal diyā thā burā bigāḌ

chal kar na zulf-e-yar ko tu ai saba bigaD

andher hoga us se agar ho gaya bigaD

aashiq ko har tarah hai musibat ka samna

achchha tera milap na achchha tera bigaD

main kyun karun kisi ko makin-e-makan-e-dil

main kyun kahun kisi se ki tu ghar mera bigaD

mauquf ek do pe nahin yar ka itab

is se juda bigaD hai us se juda bigaD

hoti thi aashiqon mein baDe lutf se basar

baiThe-biThae aap ne kyun kar liya bigaD

aise mariz-e-ishq ka kis se ilaj ho

paida kare mizaj mein jis ke dawa bigaD

nazuk-mizaj yar ka bartao kya kahun

do din raha milap to barson raha bigaD

achchhon mein aib bhi ho to daKHil hunar mein hai

rakhta hai sau banaw teri zulf ka bigaD

achchha hua 'jalil' se tum saf ho gae

aghyar ne to Dal diya tha bura bigaD