chal nahin sakti

siyāsat meñ kabhī firqa-parastī chal nahīñ saktī

huā sūrāḳh peñde meñ to kashtī chal nahīñ saktī

hamāre biich haiñ ab dushman-e-insāniyat itne

zamīñ par ab falak kī chīra-dastī chal nahīñ saktī

pareshānī bad-amnī aur mahñgā.ī kī hālat meñ

hukūmat chal to saktī hai grihastī chal nahīñ saktī

baḌhā.ūñ daam apne kyoñ na maiñ aisī girānī meñ

chalan jab hai ki koī chiiz sastī chal nahīñ saktī

kahā netā ne bhūk-haḌtāl kar ke dūsre hī din

ab is se aage merī fāqa-mastī chal nahīñ saktī

nasha ab kyā chaḌhe saaqī ne jab ye kah diyā muñh par

yahāñ had se ziyāda bāda-mastī chal nahīñ saktī

ye sun lo 'ḳhvāh-maḳhvāh' jab saaTh se ho jāoge uupar

mohabbat chal bhī jaa.e tandurustī chal nahīñ saktī

siyasat mein kabhi firqa-parasti chal nahin sakti

hua suraKH pende mein to kashti chal nahin sakti

hamare bich hain ab dushman-e-insaniyat itne

zamin par ab falak ki chira-dasti chal nahin sakti

pareshani bad-amni aur mahngai ki haalat mein

hukumat chal to sakti hai grihasti chal nahin sakti

baDhaun dam apne kyon na main aisi girani mein

chalan jab hai ki koi chiz sasti chal nahin sakti

kaha neta ne bhuk-haDtal kar ke dusre hi din

ab is se aage meri faqa-masti chal nahin sakti

nasha ab kya chaDhe saqi ne jab ye kah diya munh par

yahan had se ziyaada baada-masti chal nahin sakti

ye sun lo 'KHwah-maKHwah' jab saTh se ho jaoge upar

mohabbat chal bhi jae tandurusti chal nahin sakti