chal saki kuchh na rah-e-ishq mein tadbir meri

chal sakī kuchh na rah-e-ishq meñ tadbīr mirī

rang laatī rahī har gaam pe taqdīr mirī

aa.ina kyā hai faqat hāmil-e-aks-e-jalva

varna har zarra-e-ālam pe hai tasvīr mirī

raaz se apne maiñ āgāh nahīñ huuñ phir bhī

jāntā huuñ ki ye kaunain hai tafsīr mirī

ātish-e-ishq kā ik sho.ala-e-be-bāk huuñ maiñ

āb-o-gil se nazar aatī nahīñ ta.amīr mirī

āfrīñ jalva-e-bebāk ḳhushā faiz-e-jamāl

merī nazroñ ko dikhā.ī ga.ī tasvīr mirī

ye nazar ko hai gila shauq ne Daale parde

shauq kahtā hai nazar ban ga.ī zanjīr mirī

ab to maiñ huuñ rasan-o-dār kī manzil hai bashīr

be-ḳhudī jurm mirā ishq hai taqsīr mirī

chal saki kuchh na rah-e-ishq mein tadbir meri

rang lati rahi har gam pe taqdir meri

aaina kya hai faqat hamil-e-aks-e-jalwa

warna har zarra-e-alam pe hai taswir meri

raaz se apne main aagah nahin hun phir bhi

jaanta hun ki ye kaunain hai tafsir meri

aatish-e-ishq ka ek shoala-e-be-bak hun main

aab-o-gil se nazar aati nahin tamir meri

aafrin jalwa-e-bebak KHusha faiz-e-jamal

meri nazron ko dikhai gai taswir meri

ye nazar ko hai gila shauq ne Dale parde

shauq kahta hai nazar ban gai zanjir meri

ab to main hun rasan-o-dar ki manzil hai bashir

be-KHudi jurm mera ishq hai taqsir meri