chala-chal mohlat-e-aram kya hai

chalā-chal mohlat-e-ārām kyā hai

musāfir aur terā kaam kyā hai

hamārā vāsta hai un ke Dar se

hameñ saare jahāñ se kaam kyā hai

tumhārā husn to hai ġhair-fānī

hamāre ishq kā anjām kyā hai

ḳhudā kā naam lenā chāhtā huuñ

magar mere ḳhudā kā naam kyā hai

savād-e-shām-e-mai-ḳhāna salāmat

bayāz-e-jāma-e-ehrām kyā hai

tum apne aa.ine se pūchh lete

hamāre ishq par ilzām kyā hai

hameñ ḳhud rāsta chalnā na aayā

farāz o past par ilzām kyā hai

suno ai āshiyāñ ke ḳhushk tinko

bahār-e-bāġh kā paiġhām kyā hai

ḳhirad ke mas.ale hal karne vaalo

tumheñ mere junūñ se kaam kyā hai

ḳhabar ḳhud mauj-e-tūfāñ ko nahīñ hai

safīne kā mire anjām kyā hai

ba-rāh-e-rāst un ko māñgtā huuñ

takalluf kā duā meñ kaam kyā hai

had-e-parvāz jab simTī to samjhe

qafas kyā āshiyāñ kyā daam kyā hai

'sabā' tark-e-mohabbat kar rahe ho

mohabbat se zarūrī kaam kyā hai

chala-chal mohlat-e-aram kya hai

musafir aur tera kaam kya hai

hamara wasta hai un ke Dar se

hamein sare jahan se kaam kya hai

tumhaara husn to hai ghair-fani

hamare ishq ka anjam kya hai

KHuda ka nam lena chahta hun

magar mere KHuda ka nam kya hai

sawad-e-sham-e-mai-KHana salamat

bayaz-e-jama-e-ehram kya hai

tum apne aaine se puchh lete

hamare ishq par ilzam kya hai

hamein KHud rasta chalna na aaya

faraaz o past par ilzam kya hai

suno ai aashiyan ke KHushk tinko

bahaar-e-bagh ka paigham kya hai

KHirad ke masale hal karne walo

tumhein mere junun se kaam kya hai

KHabar KHud mauj-e-tufan ko nahin hai

safine ka mere anjam kya hai

ba-rah-e-rast un ko mangta hun

takalluf ka dua mein kaam kya hai

had-e-parwaz jab simTi to samjhe

qafas kya aashiyan kya dam kya hai

'saba' tark-e-mohabbat kar rahe ho

mohabbat se zaruri kaam kya hai