چلا ہوں چند قدم اور بھٹک گیا ہوں میں

چلا ہوں چند قدم اور بھٹک گیا ہوں میں

مجھے یہ زعم تھا منزل سے آشنا ہوں میں

خوشی سے خوف زدہ ہوں گریز پا ہوں میں

غموں کو اپنا مقدر سمجھ رہا ہوں میں

جہاں جنوں کے سوا اور کوئی راہ نہیں

شعور و فکر کے اس موڑ پر کھڑا ہوں میں

ہر ایک شے کو سمجھنے کی جستجو تھی مجھے

خود اپنی ذات میں گم ہو کے رہ گیا ہوں میں

رفیق خاص ہے برسوں سے میری تنہائی

کسی نے مجھ کو پکارا تو ڈر گیا ہوں میں

نہ جانے کون سا جھونکا ہوا کا گل کر دے

ابھی تو یہ ہے کہ جلتا ہوا دیا ہوں میں

حیات ہو گئی محرومیوں کے نام افضلؔ

نوائے نالہ ہوں میں آہ نارسا ہوں میں