chala hun chand qadam aur bhaTak gaya hun main

chalā huuñ chand qadam aur bhaTak gayā huuñ maiñ

mujhe ye zo'm thā manzil se āshnā huuñ maiñ

ḳhushī se ḳhauf-zada huuñ gurez-pā huuñ maiñ

ġhamoñ ko apnā muqaddar samajh rahā huuñ maiñ

jahāñ junūñ ke sivā aur koī raah nahīñ

shu’ūr-o-fikr ke us moḌ par khaḌā huuñ maiñ

har ek shai ko samajhne kī justujū thī mujhe

ḳhud apnī zaat meñ gum ho ke rah gayā huuñ maiñ

rafīq-e-ḳhās hai barsoñ se merī tanhā.ī

kisī ne mujh ko pukārā to Dar gayā huuñ maiñ

na jaane kaun sā jhoñkā havā kā gul kar de

abhī to ye hai ki jaltā huā diyā huuñ maiñ

hayāt ho ga.ī mahrūmiyoñ ke naam 'afzal'

navā-e-nāla huuñ maiñ āh-e-nā-rasā huuñ maiñ

chala hun chand qadam aur bhaTak gaya hun main

mujhe ye zo'm tha manzil se aashna hun main

KHushi se KHauf-zada hun gurez-pa hun main

ghamon ko apna muqaddar samajh raha hun main

jahan junun ke siwa aur koi rah nahin

shu’ur-o-fikr ke us moD par khaDa hun main

har ek shai ko samajhne ki justuju thi mujhe

KHud apni zat mein gum ho ke rah gaya hun main

rafiq-e-KHas hai barson se meri tanhai

kisi ne mujh ko pukara to Dar gaya hun main

na jaane kaun sa jhonka hawa ka gul kar de

abhi to ye hai ki jalta hua diya hun main

hayat ho gai mahrumiyon ke nam 'afzal'

nawa-e-nala hun main aah-e-na-rasa hun main