چلا سیر گل کو وہ سرو قد تو چمن چمن تھا نکھار پر

چلا سیر گل کو وہ سرو قد تو چمن چمن تھا نکھار پر

گل و غنچہ بقۂ نور تھے تھا گمان برق بہار پر

یہی بے ثباتیٔ گلستاں تھی جبین گل پہ رواں دواں

نہ سمجھ سکے اسے نکتہ داں کہ خزاں کا دانت بہار پر

مرے دم سے ہست ہے بود ہے مرے نام سے یہ نمود ہے

یہ نظام دہر ہے رقص میں مرے ساز ہستی کے تار پر

سر شام وعدہ ہیں حسرتیں کبھی روح دل کبھی جان جاں

دم صبح برسے گی بے کسی انہیں حسرتوں کے مزار پر

یہ غلط کہ رخ پہ نقاب تھا یہ تکلفانہ حجاب تھا

وہ تو بکھری بکھری نگاہ تھی دم دید چہرۂ یار پر

یہ تو اپنا اپنا مذاق تھا یہاں عقل و ہوش کا دخل کیا

کوئی جی اٹھا ترے ظلم پر کوئی مر مٹا ترے پیار پر

زہے فکر زاہرؔ حیدریؔ یہ زمین ایسی غزل کہی

ہیں تمام شعر شگفتہ تر انہیں فوقیت ہے بہار پر