chalae tir hain kitne jawab deta ja

chalā.e tiir haiñ kitne javāb detā jā

hamāre zaḳhmoñ kā kuchh to hisāb detā jā

jo aa gayā hai to ab dil kī tāzgī ke liye

lahū meñ Duube hue kuchh gulāb detā jā

mujhe yaqīn hai dariyā maiñ DhūñDh hī lūñgā

tū merī tishna-labī ko sarāb detā jā

na dekh mere aziyyat-navāz lamhoñ ko

mire nasīb kā mujh ko azaab detā jā

jo tū hai sāqi-e-mahfil to rind ham bhī haiñ

hamāre hisse kī ham ko sharāb detā jā

'umar' batānā hai nasloñ ko zillatoñ kā sabab

tū apnī bazm ke chang-o-rabāb detā jā

chalae tir hain kitne jawab deta ja

hamare zaKHmon ka kuchh to hisab deta ja

jo aa gaya hai to ab dil ki tazgi ke liye

lahu mein Dube hue kuchh gulab deta ja

mujhe yaqin hai dariya main DhunDh hi lunga

tu meri tishna-labi ko sarab deta ja

na dekh mere aziyyat-nawaz lamhon ko

mere nasib ka mujh ko azab deta ja

jo tu hai saqi-e-mahfil to rind hum bhi hain

hamare hisse ki hum ko sharab deta ja

'umar' batana hai naslon ko zillaton ka sabab

tu apni bazm ke chang-o-rabab deta ja